ठाणे/प्रतिनिधी - गडचिरोली जिल्ह्यातील हेमलकसा येथील आमटे कुटुंबीय संचालित लोकबिरादरी प्रकल्प प्रदर्शनाच्या रूपाने ठाणेकरांच्या भेटीस येत आहे. शुभंकरोती हॉल, न्यू इंग्लिश स्कूलजवळ, नौपाडा येथे १८ ते २१ सप्टेंबरदरम्यान सकाळी १० ते रात्री ९ दरम्यान हे प्रदर्शन नागरिकांसाठी खुले असेल.
१९७४ मध्ये बाबा आमटे यांनी हा प्रकल्प सुरू केला. त्यांचे पुत्र डॉ. प्रकाश आणि स्नुषा मंदाकिनी आमटे सुरुवातीपासून इथे कार्यरत आहेत. या प्रकल्पात दरवर्षी सरासरी ४५ हजार रुग्णांवर उपचार केले जातात, तसेच ३०० शस्त्रक्रियाही होतात. १९७६ मध्ये आदिवासींच्या मुला-मुलींची शिक्षणाची सोय व्हावी म्हणून येथे आश्रमशाळा सुरू करण्यात आली. सुरुवातीला त्यात २५ विद्यार्थी होते. सध्या या शाळेत ६५० विद्यार्थी शिक्षण घेत आहेत. तिथे बारावीपर्यंत शिक्षणाची सोय आहे.
वन्यप्रश्नण्यांचे अनाथालय हेही हेमलकसाच्या लोकबिरादरी प्रकल्पाचे वैशिष्टय़ आहे. या बहुउद्देशीय प्रकल्पास भेट देण्याची अनेकांची इच्छा असते, पण वेळेअभावी गडचिरोलीला जाणे सगळ्यांनाच जमत नाही. या प्रदर्शनाच्या निमित्ताने मुंबई-ठाणेकरांना छोटय़ा स्वरूपात का होईना, हा प्रकल्प समजावून घेता येईल. तसेच या समाजोपयोगी प्रकल्पास यथाशक्ती मदतही करता येईल. संपर्क- २५३४११८५/ ९८२१०१३६४१.
No comments:
Post a Comment